Arang tơkeng kơ Nay Der pơ ƀôn Ơi Nu, ƀao ia
Siêm, tring Krông Pa, čar Gia Lai. Mơng anet ñu jing sa čô mơnuih rơgơi,
thâo pơmin, hơdip hiam klă, djop mơnuih kiăng khăp biă mă kơ ñu. Ñu lĕ ană rin ƀun,
ană drit druai djai amĭ mơng mơda, djai ama mơng anet, samơ̆ bưng ñu prong biă
mă, mâo hĭ ƀing sang pơdrong amăng ƀôn thâo pap drap ƀă ƀem čem rông ba ñu. Ñu
kơnong min kơ bruă hma, wai rơmô kơbao hang at ƀu thâo lui mơn bruă hrăm hră,
ngă pơ-ar.
Rơnuk anun, tơlơi thâo ngă hma pla pơdai, pơdjai rok rum,
mâo kông ngan jing ư-ang biă mă, samơ̆ Nay Der dui thâo hluh ƀuh hlâo dlăng dum
bruă anun ka djop ôh amăng tơlơi hơdip ană mơnuih, bôh nik ñu tơlơi hơdip djuai
ania Jrai. Tui anun ñu gir kơtir ƀu kơdun kơ tơlơi tơnap tap ôh, yua dah ñu kiăng
tui hyu sem tơlơi bơngač ană mơnuih. Anun lĕ tơlơi thâo hră.
Sit nik, lơm thun ƀu rơnang, phang ƀu mơ-ak, hơdip amăng
tơlơi blah wang, tơlơi kơtư̆ juă mơng Prang, bruă rin tơnap djop mơta ƀu tlaih
ôh. Laih dong, tơlơi hơdip ană Jrai rơnuk anun dô̆ mluk mơgu lu biă mă.
Hong pran hur har kiăng hrăm hră, Nay Der ƀu mâo hơget ôh dui pơgun pơgan anap ñu.
Ñu nao hrăm hră hang gir kơtir truh kih. Laih anun, ñu nao hrăm bruă ngă nai pơ
Kwi Ñơn. Tơbiă mơng hrăm ngă nai, ƀuh Nay Der puăi rơhao, tlao rơhmač
hang thâo bruă, Prang brơi ñu pơtô pơ čar Kon Tum.
Sa čô mơnuih
thâo min, ñu đih ƀu sir mơnit, pit ƀu sir tơngia ôh. Ñu dô̆ min yôh yam kơ
bruă, kơ tơlơi hơdip djuai ania Jrai hyưm ngă kiăng kơ tlaih hĭ mơng tơlơi
mluk mơgu, ană ƀôn sang hơdip rơnuk rơnang. Dong mơng anun yơh, ñu thâo
hluh đuăi tui ngă hơkrŭ, pơtrut pơsur pran jua ñu pơčeh bôh hră Jrai
mâo tŭ yua truh kơ ană tơčô rơnuk anai.
Dum bruă anun pơƀuh
kơ ta lu mơta hiam klă amăng tơlơi hơdip Nay Der. Sit nik bruă anun jing apui
pơčrang rơđah hang kông ngan kơ ai hơtai, tơlơi min hang jing bruă prong prin
biă mă kơ rơnuk tơdơi.
Ama Sawa
